Tixdani waxay soo baxday 2/06/2019, waxaanan curiyey 29/05/2019. Waxaanay ka hadlaysaa Sooyaalkii Taariikheed ee ay Somaliland soo martay iyo marxalada ay maanta marayso, iyadoo dhiiri-gelinaysa mashruuca Shaqo-qaran ee ay Xukuumaddu iminka bilowday, taasoo ay tixdu talo iyo tusaaleba siinayso Dhalinyarada ka soo baxay dufcadii 1-aad.

Waxaanu ku bilaamay sidan:

Haddii Gabay Tilmaan leeyihiyo Tuf iyo luuq toosan.

Amma Tahami lagu faaqidiyo Nololsha Taabkeeda

Amase uu aftahan toojo geel Iyo Tiiris ku amaano

Amma lagu takilo guul nin Helay Turuq Ku soo hoystay

Anuu taajku ii saaran Oon tiraab odhane

Oo tabta Ararta waataan rag badan Toorinka u qoraye

caawana tixdaan tirinayaa toban god weeyaane

Taliyaha Abwaankoow guddoon Tacab wacaalkeeda…

Teer iyo Dharaartii dalkani Dhidibka loo taagay

Ee lixdankii godkii lagu tafulay uu dib uga soo toosay

Ee taxad dhismaha laga alkumay Madashii towfiiqda

Rabi tiisa mooyee iyadoon cid kale Gacan ku taageerin

Amma Rabi tiisa mooyee Aadmi kale Gacan ku taageerin

Taladdiisa Madaxdii qabtaye midima Taym joogay.

Nin waliba Tusmuu reerka furay taallo ugu Taale

Adna taagtay Muusoow Tiriig hirrasho toolmoone.

Kumanaanka Tuudaha xidhane Tacabku soo saaray

Ee ku tartamay Mashruucuu Xisbigu tallo ku heenseeyey

Tubta Horumarkuu kow ka noqon Tababarkoodaasi

Marka howsha lagu toosiyee lagu tilmaan-siiyo

Oo hal aan tabaynay weeyaan Qorshahan Taaba-galay Maantu.

Kuna Taxan Tusmada Dawladnimo Qaran Tilmaantiisa.

Isku-tashiga Somaliland buuxsan Turuqiiye

Oo Waa Tu’ lagu najaxayoo ku timi Talo aqooneede

Waxa jira Dad ay Taws ku tahay tan iyo Waagiiye

Oo inay tagooggaha qabtaan abid u taagnaaye

Tuhun nagama saarnayn markay Tahan ka muuqdeene

Iminkay tacliin soo bareen qaar talaal qaba’e

Tabashada Siyaasiga ka culus tookha dhowr hebele

Qorshe hoos ka taxan-baa ku ladhan ee taa hala ogaado.!

Kuwa tegayna Taariikh-xumay gacan-togleeyeene

Ha yeeshee Tumaatiday dhigeen guul umay tarine

Hadday Moodayeen inay yihiin tiir la tebi doono

Tamartoodu noogama duwana tibix Candhuufeede

Todobaatan beribaynu sugi Turuf halkuu geeyo.

Afartaa tilmaamaye haddaan tallo u sii dhaafo

Dhalinyarada Soo tababartoow toosh hor laad tihine

Turuq iyo tigaadbaad tihiin Tacab ka muuqdaaye

Qayrkiin Tus-baad dheer tihiin aan tirmayn abide

Qof waliba halkuu tabbaniyaye maanka ugu taagan

Ee uu takhasuskeena helay Tigidhna loo siiyey

Haka tumo fadhiidkoo ha guddo tacabka loo geystay.

Ragga Tororogtiyo Faanka iyo tahan isgaadhsiinta

Talan-taali weedhaha naxliyan ugu turqaynaaya

Tawxiidka Calankaa lehiyo Qaranka Tayt gaadhay

Ee uu Tudhaale iyo wanaag Taarig uga leexday

Wallee tiina noqon mayso oo taa anaa huba’e

Haku talax-tegina Talo-xumada Towbad-baa imane.

Tir-tirsiga asxaabtuna ha damo Waa turxaan bixine.

By: Saleban Cabdi Cali (Kalshaale)

Email: curad1986@hotmail.com